EL PROFESSOR E EL CARDINAL

Verament appassionant e femm minga fadiga a credell perchè el Pier el scriv semper di ròbb interessant fòrt e semper pussee de attualitaa: BRAVO !



EL PROFESSOR E EL CARDINAL

La sira del 4 marz 1882, ona sira s’cura senza lunna, el professor Francis James Child de Cambridge (Massachussetts) l’era ona anema disperada; el gh’aveva apenna recevuu ona lettera cont el timber del Vaticano firmaa pròppri de pugn da soa eminenza el cardinal Camillo Ruini, gesuita in fama de esorcista e vun di promotor del comità pro “Ceppaloni, patrimoni de l’Umanità”.
Ma devom faa on pass indree.
Lì adree 20 agn el professor Child, plurilaureaa e insegnant in quell de Harvard, el gh’aveva collezionaa, catalogaa e numeraa on corpus de ben 305 ballad popular ingles e scozzes (domà el test senza la musica), cattaa su come se dis “sora el camp” da luu medem o el frutt de ona fitta corrispondenza cont i sò collegh american e europei. L’òpra, monumentalla e senza precedent per certi caratteristic peculiar – gh’è quij che disen inscambi che senza la pubblicazion de i manoscritt del Percy, del Walter Scott e del William Tytler Brown, ghe saria staa minga i liber del Child – l’era arricchii cont di variant che mostravan in tanti casi l’identità, la diffusion e la continuazion de credenz, miti, usanz e personagg in del folklore di vari Cultur, i pussee disparad.
Tegnom present che el lavoreri del Child l’haa dervì la straa a duu volum essenzial: “English Folk Songs From The Southern Appalachians” (1932) del Cecil Sharp (di ballad angloscotoirlandes confluii in de la tradizion musical bianca e anca de color de Virginia e North Carolina) e “Traditional Tunes of The Child Ballads (1959) del Bertrand H. Bronson (test cont finalment la musica appress, in quatter tòmmi).
El manoscritt l’era ormai bell che corregiuu e pront per la tipografia quand el nòster luminar se ved recapitaa el bigliett del Ruini che el gh’haa daa appuntament per el doposcena al pub “The Sirchia Connection”, visin la gesa presbiteriana, in front al porton de l’Università. El Child inforca i oggiaj, ciappa el tabarr e el baston, saluda la servòtta irlandesa e el va foeura de cà. Dent el pub, riscaldaa da ona bella radis de moron in su el camin, tra el fumm di sigar e el fumm de la fiamma che la fà fadiga a cascià, el professor el ricognoss subet el porporaa in clergyman settaa giò dinnanz a ona pinta de Bulldog strong ale (imported). El cardinal, sòlta i convenevol, e cont tutta disinvoltura el ghè faa: “Francis, ti te poeudet minga pubblicaa el nummer 54, “The Cerry-Tree Carol”, l’è el passagg de on vangel apocrif (plagiaa, tra l’alter, anca da l’Angelo Branduardi sotta el titol “Il Ciliegio”); Francis, bisogna che te scancellet el nummer 78, “The Unquiet Grave”, se parla de on assassin impunii; Francis, el nummer 173, “Mary Hamilton”, l’è on incest de bon e el nummer 277, “The Wife Wrapt In Wether’s Skin” l’è ona vergògna che l’è mej tasè. Francis… Francis… Francis…”
El Francis, cont gianmò el coo ch’el ghe pirlava ‘me ona trottola, el se netta el pin-nez, el tira su ona presina de tabac, el varda ben ben el cardinal Camillo Ruini: el ved duu ròbb che spuntan sora la front, on abbozz de coa, di sciampitt de cavretta…
Lancia on url strossaa, el sgambetta e pussee bianch de on lenzoeul el se disseda tutt bagnaa in del sò lett; cor la servòtta, coren i visin de cà, cor anca on parent del portinar de la Okeh, titolar de on agenzia immobiliar a Boston, cor anca luu vers el sò amaa faldon sora el tavol del studi. El manoscritt l’è lì, fresch ‘me ona ròsa, in tutt i sò part, cont i 305 ballad, né vuna in puu, né vuna in men…
“English And Scottish Popular Ballads” del Francis James Child, in cinq volumm, el vegn daa ai stamp a Cambridge intra el 1882 e el 1898.
El resta vun di tesòr de la musica popular.

Pier