el dialett a scoeura..... e minga domà a Milàn

De on poo de temp, e grazie a la riforma Moratti, in di scoeur se poeud fà imprend ai nòster fioeu el dialett, la lengua mader de cà, con di laboratòri fà appòsta.
Chì a Milàn, de quell che soo mì, gh'è on quajvun, ona mea cara amisa, che la tegn di lezion con cont, liend e canzon in Milanès, in di scoeur del nivell primari (4° e 5° elementare).
Poeu la gh'è la famosa scoeura "Bosina" de Vares, in doe che se fà scoeura con i tradizion locai e la lengua bosina; anca la scoeura per i pussee piscinnin de cinq agn, de Albavilla, scoeura de l'Infanzia "Giobbia", in doe che hann ciappaa l'iniziativa de on laboratori per fà minga perd, desmentegà i tradizion e el brianzoeul: ghe fornissen anca on diploma rigorosament scrivuu in alto-brianzoeul.
El saria anmò pussee bel se, chì a Milàn, on quajvun d'alter el tegn di laboratori inscì bei, con cont, liend, canzon e quant'alter per i belee e minga domà per quei ch'hinn Milanès, perchè anca quist intraprendenze chì voeuren dì "integrazion".