El 13: Viva Santa Luzia !!!

Santa Luzia l'è el dì pussee curt che ghe sia !

L'è el proverbi che dis che in quel dì chì el So el tramonta on quaj menud primma di tutt i alter dì, per poeu scomincià a noeuv la soa salida al Solstizi d'Inverna, quand che el Nass a noeuv.... Nadal, Belenos, el So belee, i giornad che scomincien a slongass....
In di paes Nordich hinn sòlet festeggià el Nadal (Jul) in quel dì chì, quand che el So el nass a noeuv, portand ona luss pussee ciara e netta.
In Svezia, presempi, la tosa pussee gioina la se mett adòss ona vesta bianca, che simboleggia la s'cettezza, e la se pon sora el coo ona coròninna verda con sett candir, de chì, la va in di stanz a portà el caffè, lacc e bescòtt a la fameja che l'è anmò in del lett, sòtta al teved di covert.
Quist cadò chì se ciamen "joklappar", e a hinn de cà anca de nunch.
Gh'è de savè che el calendari de l'Advent che i nòster fioeu derven dì per dì, con denter di present, vegnen de questa usanza.
In di nòster sitt, i bagaj scriven i letterin, fasend l'elench di cadò che voeuren, disend a la Santa che a hinn staa pròppri bon.
Santa Luzia lassa giò i cadò sora el scòss di finester, e in d'alter sitt la sònna el campanell per visà del sò rivà per podè intròduss de scondòn in di cà, e i fioeu van de corsa in del lett perchè inscambi gh'avaran nient.
Per ringrazià la Santa lassen del pan, naranz, mandarin e del latt.