La Fameja di sett color (Liend belee)

Ve conti suu ona liend per belee. Speri che la ve piass. Sont adree fà sù anch un librett cont i disegn....

_______________________________________________________________________________________

LA FAMEJA DI SETT COLOR


Sora in ciel grand, gh’era ona Fameja simpatega fòrt che la se ciamava «Arcobalen»:
ona mama sbarlusenta, contenta e sett belee, bon e semper ubbedient.
T’ii poeudet vidè anca tì, se te vardet el ciel quand che torna indrè el sô apòs on temperi.
‘sti sett fredej desmetten de laorà e, tucc assema, se metten adree picciurà on gran arch coloraa per fà legrìa !

Quìi sett fioeu gh’hann tucc on lavoreri de fa sù sora la terra. El pens che gh’haa dà la mama l’è quell de dagh a tuscòss di color viscor e sberlusent.


VERD

La mama el gh'haa crompà on monopattino, inscì VERD el poeu corr in di praa, bosch e altur: a la soa passada tutt el deven sberlusent.
El corr del mattin a la sira perchè el dev penciurà i praa, i erbol, i foeuj, i piccaj di fior, i gelosii di cà e i canimel de menta di belìn.


VIOLETT

VIOLETT el laora domà la sira. A la calada del sô, luu el ghe dà ona penciurada al ciel, vuna ai nigol e ona pennellada ai vioeur del penser.


ROSS

ROSS a l'è on belee ardent viv. Luu el gh'haa la mansion de dagh on bel color viscor ai roeus, ai papaver, ai pòmm, al foeugh, ai tecc di cà, e ai ganassin di bagaj.


GIALD

Anch GIALD l'è tutt ciappaa: el penciura i loeuv del forment, i girasô, i margaritin e i ragg del sô el jutten a indorà la polenta !



NARANZ

NARANZ el someja on ciccin a GIALD e on ciccin a ROSS.
El penciura di bell naranz, mandarìn, nespol e di cachi. Domà luu l'è bon de fà tutt quest capolavòri !!!


BLOEU e CELEST

BLOEU el laora semper assema la soa sorella CELEST. El ciel e el mar hinn azzurr vigoros e brillant comè.
Assema lor duu dann di penciurad trasparent al ciel e pussee s'ciur al mar. Deven laorà assema perchè el lavoreri a l'è tant: a hinn inscì ampi el ciel e el mar !

I sett belee birlen per el mond e hinn semper de pressa !
Quand che l'è luster el ciel el sô el fa ciar in ògni canton, lor vegnen indree a cà, content de'l splendor del mond.
Hann fà fadiga de bon quist sett belee: adsedess de sora l'Arcobalen rimiren la gran òpra.
El sbarlusiss el Creaa: comparissen milla e milla i sò color, e pur hinn tucc nassuu di sett pennell de la magica Fameja Arcobalen.