24 April: San Giòrg

A l'è ona tradizion tutta Milanesa festeggià el 24 April "San Giòrg", quand che Milàn festeggia la liberazion de Maiorca di turch in de l'ann 1340, quand che el santu guerrier faseva la soa comparsa in di trupp Cristian.
Semm sòlet fà festa con el ritual de la "PANERA e PANMEJN", carsenz con pan giald (de melgon) dolz: pan che in di temp antigh a l'era fà con el MEJ.
Poeu se fà ona pacciada con la "PANIGADA" che l'è ona carsenza con fior de sambugh pocciada in de la panera sliquida.
L'è osanza andà a fà San Giòrg foeura pòrta per fà inzetta de formaj fà cont el lacc de la primma erba de l'ann.
De fatt questa celebrazion del lacc e di lattee Milanès la ven de on cont antigh.
Se dis che Luchino Viscont scior de Milàn, l'aveva ciappaa i arm contra el bandii famos Vione Squilletti, che infestava la nòstra bassa cont ona banda, per defend i pòver pajsan semper minaccià.
In d'ona localitaa che la se ciama Morì-vione, el bandì l'è staa coppaa.
L'era el dì de San Giòrg: a luu el vegniva attribuii el meret de questa vittòria.
Sicchè dònca quel dì l'era anch cald caldisc, inscì i lattee scoeudeven la set di soldaa di Viscont cont el "FIOR DE LACC".
Inscì a regòrd de quell dì lì i nòster vegg seren sòlet andà foeura pòrta a fà la "PANERADA" in di trani per ciappà la PANERA (fior de lacc), el PANMEJN e la PANIGADA cont ona spolverada de zuccher.